ለቀጣይ ትውልድ
ብሩህ ተስፋን እንገንባ

የትምህርት ቤታችን አጭር ታሪክ

የኮን አጠቃላይ ሁለተኛ ደረጃ ትምህርት ቤት በአማራ ክልል ሰሜን ወሎ ወረዳ የሚገኝ ትምህርት ቤት ነው። ትምህርት ቤቱ በ 1945 አ.ም ተቋቋሞ እስከ አሁን ድረስ ተማሪዎችን እየተቀበለ ለትልቅ ደረጃ ሲያደረስ የቆየ እድሜ ጠገብ አንጋፋ ትምህርት ቤት ነው።

ላለፉት 73 አመታት በቁጥር ይህ ነው ተብሎ ሊጠቀስ የማይችል በትምህርታቸው ሃገራቸውንና ወገኖቻቸውን የረዱና እየረዱ ያሉ ታላላቅ ሰዎችን ማፍራት የቻለ በክልሉ ከሚጠቀሱ ዝነኛ ትምህርት ቤቶች አንዱ ነው። ይህን ትምህርት ቤት ከሌሎች መሰል ትምህርት ቤቶች ለየት የሚያደርገው ከተመሰረተበት ጊዜ አንስቶ ከተለያዩ ወረዳዎች እንዲሁም በወረዳው ውስጥ ካሉ ከ25 የሚበልጡ ቀበሌዎች የሚመጡ ተማሪዎችን እየተቀበለ ያስተማረና እያስተማረ የሚገኝ መሆኑ ነው።

ፋውንዴሽናችን እንዴት ተጀመረ

ትምህርት ቤቱ በተለያዩ ችግሮች ምክንያት ማለትም የትምህርት ፋሲሊቲዎች (ግብአት) በበቂ ሁኔታ አለመኖር እና በቴክኖሎጂ የታገዘ ትምህርት አለመሰጠት ተማሪዎች ከሌሎች ትምህርት ቤት ተማሪዎች ጋር ተወዳዳሪ እንዳይሆኑ እንቅፋት ሆኖ ቆይተዋል። ስለዚህ እነዚህን ከላይ የተጠቀሱትን ችግሮች በመገንዘብ የኮን ሃይስኩል ፋውንዴሽን ማቋቋም እንደ መፍትሔ ታቅዶ በትልቅ ራእይ የተጀመረ ፋውንዴሽን ነው። ስለሆነም ከአካባቢው ማህበረሰብ ጋር፣ በዚሁ ትምህርት ቤት ተምረው ትልቅ ደረጃ የደረሱ የቀድሞ ተማሪዎችን በመያዝ እንዲሁም ዓላማችን በመደገፍ ተባባሪ በመሆን የበኩላቸውን ኣሻራ ለማሳረፍ ፈቃደኛ በሆኑ ቅን ልቦና ባላቸው ግለሰቦችን ጭምር በማካተት የመፍትሔ አካል እንዲሆኑ አድርጎ ስራውን ጀምሯል።